ι.ξΑΥΝΟΧ        (omagxe al K. Sajmak)

        Sxtono

Sub Teraj cxieloj -
Proksime? Lontane?
Sub suno aux steloj?
Kun senco aux vane? -

    Kusxadas la sxtono.
    Malhela, krudforma,
    Li krias sen sono
    Pro tordo endorma.

Turmentas lin songxo,
Eterna deliro:
Ekscito de l'plongxo,
Mistero de l' iro,

    De l' flugo fabelo...
    Lin logas senventa
    Profunda cxielo -
    Aera, argxenta...

Li kusxas sen movo,
Kaj kreskas la certo:
Li estos nek bovo,
Nek bird', nek lacerto,

    Sed filo fiera
    De l' best' forgesita -
    Antikve severa
    Vivajxo elmita

Kun fluga scipovo,
Kun sxat' je atako -
Li estas la ovo,
La ovo de drako.

    La drako en ovo
    Sopiras kaj plendas,
    La tempon de l' kovo
    Li mute atendas...

En negxoj kaj maroj,
En sabloj kaj torfoj
Eksvenis por jaroj
Milmiloj da orfoj -

    Sennombro da fratoj
    Parencoj sen pruvo -
    Sub larmoj kaj batoj
    De hajlo kaj pluvo.

Eksteras - senago,
Internas - la flamo:
Revado pri l' Tago,
Pri tusxo da l' skvamo,

    Pri fajf' de l' flugiloj -
    Pri ven' de l' patrino.
    Kaj fluas jarmiloj
    En morna senfino.

Atendas sentime
La idoj en sxeloj -
Lontane? Proksime? -
Sub Teraj cxieloj.

Finitas 12.05.1992